📷 في وسط ما احنا مشتتين، أمريكا خلال الساعات اللي فاتت حشدت قوات لم يشهدها الشرق الأوسط منذ حرب الخليج.
أغلب الناس في اليومين اللي فاتوا كانوا متابعين المؤتمر الاقتصادي العالمي في دافوس، وإهانات ترامب لقادة أوروبا وتهديده بالاستيلاء على جرينلاند، وتصريحات الرؤساء والوزراء الأوروبيين التاريخية اللي بتعلن لأول مرة انقسام وانشقاق سياسي عميق ما بين أوروبا وأمريكا لم يحدث من قبل منذ عصور الإمبراطوريات والاستعمار…
📷 بس اللي محدش واخد باله منه بقى هو إن كل ده كان مقصود بشكل كبير عشان يشتت انتباهك… وإن في وسط ما احنا مشتتين، ترامب كان بيعمل أقدم وأخطر حركة في كتب الحروب: تشتيت شامل قبل الاستهداف.. والهدف حسب تقديرات الصحافة: إيران…
📷 خليني أحكيلك تفاصيل اللي فاتك خلال الـ 48 ساعة اللي فاتوا، عشان العالم شهد تطورات مهمة وخطيرة فعلًا ولازم تبقى واخد بالك منها عشان تفهم أيه اللي جاي…
وهقسملك الموضوع على محورين؛ أول حاجة اللي حصل في دافوس، وتاني حاجة هي اللي بيتحضر دلوقتي لإيران…
📷 نبدأ بالمحور الأول… مؤتمر دافوس… 📷
📷 تخيل إنك تصحى تلاقي اللي اتبنى بعد الحرب العالمية التانية، نظام غربي كامل بقاله 80 سنة، بيتفك قدام عينيك في كام يوم؛ بإهانات علنية وابتزاز اقتصادي، وفضايح دبلوماسية على المسرح العالمي…
اللي عمله ترامب في دافوس امبارح مكانش مجرد شوية تصريحات مستفزة، ده كان كسر حقيقي للنظام الغربي نفسه، وإعلان غير رسمي إن زمن الشراكة بتاع زمان خلص، وإن أمريكا دلوقتي بتتعامل بمنطق الإمبراطورية العظمى…
📷 ترامب دخل مؤتمر دافوس وهو مهدد بفرض جمارك بنسبة 10% على واردات من 8 دول أوروبية أعضاء في الناتو، جمارك كان مفروض تدخل حيز التنفيذ في 1 فبراير 2026… والرسالة اللي ورا ده كانت بسيطة… يا إما أوروبا تسهل اتفاق بخصوص استيلاء أمريكا على جرينلاند والقطب الشمالي، يا إما هتواجه ضغط اقتصادي مدمر ولا يحتمل…
الموضوع حسب ما ترامب قدّمه كان جاي في صورة فاتورة تاريخية… أمريكا – على حد قوله – أنفقت تريليونات الدولارات على حفظ أمن الناتو وتسليحه، ودلوقتي عايزة مقابل…
📷 والمقابل ده هو أيه؟!
جرينلاند…
📷 الجزيرة دي بالنسبة لـ أمريكا هي عبارة عن “قطعة جليد”… بس قطعة جليد ليها قيمة أمن قومي خطيرة، عشان هيتحط عليها جزء من بطاريات الدفاع الصاروخي الأمريكية الجديدة، المعروفة إعلاميًا بـإسم “القبة الذهبية”، وكمان عشان هي موقع مثالي على ممرات القطب الشمالي المتجمدة، واللي بدأ الجليد اللي فيها يذوب دلوقتي بفضل الاحتباس الحراري والتغير المناخي، ويكشف عن ممرات ملاحية تجارية شديدة الأهمية هتغير من شكل التجارة في العالم كله قريب، وهتنافس قناة السويس نفسها…
أوروبا فهمت الرسالة بمعناها الحقيقي… إنها ابتزاز ونوع جديد من الاستعمار الأمريكي المرة دي، واللي لأول مرة بيتعمل فيهم هما!
📷 والتقيل بقى هو اللي حصل بعدها…
ترامب أعلن فجأة إنه بعد اجتماع “مثمر للغاية” مع مارك روته أمين عام حلف الناتو، إنه تم وضع إطار عام لاتفاق مستقبلي بخصوص جرينلاند والقطب الشمالي، وبناءً عليه قرر ترامب تعليق الرسوم الجمركية اللي كانت هتتطبق على أوروبا في 1 فبراير!
طب يعني أيه؟!
📷 يعني ببساطة أوروبا كلها اتكسرت وجريت على التفاوض تحت التهديد الأمريكي، وترامب خد اللي عايزه… وقريب أوي هنشوف قوات أمريكية جديدة بتنزل على جرينلاند وقواعد عسكرية وبطاريات دفاع جوي وأشياء كتير هتتحط هناك، ومحدش في أوروبا هيعرف يفتح بقه…
📷 وهنا نيجي للمحور التاني…
📷 في وسط كل اللي بيحصل ده، ووسط انكسار زعماء أوروبا، ترامب كان بيحضر لحاجة تانية ضخمة جدًا في إيران، هتغير الشرق الأوسط والعالم كله!
من حوالي أسبوع كده، ومن بعد ما أمريكا كانت أجلت الضربة اللي كانت هتتنفذ على إيران، اتضح (زي ما قلتلك في مقالات سابقة بالضبط) إن ترامب ملغاش الضربة ولا حاجة… بل قرر إنه يعمل خطة مختلفة…
📷 أمر القوات البحرية بإنها تحرك حاملة الطائرات الأمريكية إبراهام لينكولن من المحيط الهادي وتجيبها الشرق الأوسط…
وبالفعل الحاملة دي عدّت مضيق ملقا في اتجاه بحر العرب، وحاليًا التقارير بتشير لوصولها خلاص للشرق الأوسط…
وعايز أقولك ان الحاملة دي لوحدها شايلة عليها أسطول جوي كامل يقرب من 80 لـ 90 طيارة ما بين مقاتلات وطيارات رصد واستطلاع، ومعاها مدمرات صواريخ من فئة آرلي بيرك…
📷 تحليلات مصادر الاستخبارات المفتوحة OSINT على شبكة “إكس” بتقول إن الحاملة بالفعل عطّلت نظام التعريف الآلي AIS، ودي حركة معروف إنها بتحصل قبل بدء العمليات الحساسة والكبرى…
وفي نفس الوقت أشارت بعض التقارير الأخرى لبدء تحرك حاملة تانية اسمها “جورج بوش” من مينائها يوم 16 يناير اللي فات، وانها قربت بردو توصل للشرق الأوسط…
📷 وعلى الناحية التانية، أمريكا نقلت مركز ثقلها الجوي كله للأردن، وبالتحديد قاعدة موفق السلطي في منطقة الأزرق…
دلوقتي وحسب تقارير المصادر الاستخباراتية، في تمركزات لأسراب من مقاتلات F-15E Strike Eagle جاية من قاعدة لاكنهيث في بريطانيا، وصل عددها لحوالي 36 طيارة، في أكبر تمركز للمقاتلات الأمريكية في الشرق الأوسط حاليًا…
📷 ومعاها؛ في طيارات تزود بالوقود من نوع KC-135 منتشرة بكثافة، ده غير ان أمريكا عملت جسر جوي ضخم بأكتر من 15 طيارة شحن عسكري من نوع C-17، اللي قدرتها بتوصل لحد 77 طن حمولة من المعدات العسكرية للطيارة الواحدة!
📷 وكل ده في خلال الـ 36 ساعة اللي فاتوا فقط…
لو مش فاهم معنى وجود القوات دي كلها أيه، فخليني أنقلك كلام الخبراء والمحللين العسكريين: “النوع ده من النقل والحشد العسكري مش بيحصل غير لما يكون في تجهيزات لعمليات طويلة ومستمرة، لأن القاعدة تقول إن اللوجستيات بتيجي الأول، والضربة بتيجي بعدها…”
📷 طب ليه ترامب استنى لحد دلوقتي، وليه مضربش إيران من أسبوع؟
عشان إيران أعلنت إن ردها مش هيبقى مباشر على أمريكا، لكن على القواعد الأمريكية في العراق وسوريا وقطر والخليج… وبسبب ده واشنطن قررت تغير الخطة، وبدأت تقلّص وجودها البشري في قواعد ثابتة زي عين الأسد في العراق، وقاعدة الأمير سلطان في السعودية، وحتى قاعدة العديد في قطر، واستبدلت ده بفكرة الجيش المتحرك…
📷 يعني أيه جيش متحرك؟!
يعني بدل ما تسيب آلاف الجنود في قواعد سهلة الاستهداف، قررت تعتمد على حاملات طائرات، وضربات محددة يتم توجيهها من الجو ومن البحر… بحيث لو إيران ردّت ما تلاقيش أهداف أمريكية تقليدية تضربها، وتبقى مضطرة توجه ردها لإسرائيل…
وده بالضبط اللي بيحصل دلوقتي!
📷 عشان كده إسرائيل داخلة حاليًا في حالة استنفار غير عادية، ونتنياهو عقد اجتماعات أمنية مع قيادات الأجهزة، والجيش نشر منظومات دفاع جوي في كل الأراضي المحتلة، وفي تقارير عن إخلاء جزئي لبعض المستشفيات، وكمان في 3 طيارات F-35 جديدة وصلت من أمريكا لقاعدة نيفاتيم في النقب…
📷 طب هي إيران واقفة بتتفرج؟!
لأ خالص… بحسب مصادر من الحرس الثوري، فـ كل حتة في إيران دلوقتي فيها قوافل بتنقل مسيرات وصواريخ ومعدات عسكرية ثقيلة بين مدن مختلفة، مع أوامر عاجلة تم إطلاقها بعودة القادة العسكريين لقواعدهم خلال 48 ساعة…
📷 بس الأخطر من كل ده بقى هو دخول الصين على الخط!
في كلام متكرر في كذا مصدر عن وصول ما بين 16 لـ 20 طيارة شحن عسكرية صينية، أغلبها من نوع Y-20، خلال حوالي 56 ساعة، بحمولة إجمالية تقرب من 1200 طن… وده معناه خطير وكاشف…
📷 معناه إن الصين حاليًا عاملة جسر جوي كبير لإيران، والله أعلم أيه المعدات اللي بتنقلهالها؛ بس التقارير بتتكلم عن إن المعدات الصينية اللي راحت لإيران بالفعل بتشمل أنظمة دفاع جوي صينية من نوع HQ-9 ونوع HQ-22القادرة على كشف التهديدات الشبحية، ومعاها رادارات إنذار مبكر وقدرات حرب إلكترونية، وصواريخ موجهة…
الصين تقريبًا كده خلاص أدركت إن الحرب الجاية على إيران هتكون حرب وجود… لإن أمريكا لو نجحت في إسقاط إيران، فهي هتحرم الصين من حوالي 12% من اجمالي احتياجها من النفط تقريبًا، وكمان هتبقى أسقطت رأس الحربة في التحالف الصيني والروسي…
📷 التقديرات كلها تشير لإن الضربة الأمريكية على إيران (لو حصلت فعلا) هتتم قبل نهاية شهر يناير، وغالبًا هتكون في وقت أجازة أسبوعية عشان الأسواق تبقى قافلة… ولحد ما يحصل أي جديد هفضل متابع معاك التطورات كلها كالعادة.
